Bakı Texniki Kollecinin tələbələri Səməd Vurğun muzeyini ziyarət etdilər.
16.04.2026-cı il tarixində Bakı Texniki Kolleci Publik Hüquqi Şəxsin “Dil və ədəbiyyat” fənn birliyinin müəllimi Aysel Əlizadənin təşəbbüsü ilə Azərbaycan Xalq şairi Səməd Vurğunun 120 illik yubileyi münasibətilə şairin ev-muzeyinə bir qrup tələbənin iştirakı ilə ekskursiya təşkil olunmuşdur.
Tədbirin əsas məqsədi tələbələrə milli ədəbiyyatımızın görkəmli nümayəndələrindən biri olan Səməd Vurğunun həyat və yaradıcılığını daha yaxından tanıtmaq, onların ədəbi irsə marağını artırmaq və estetik dünyagörüşlərini zənginləşdirmək olmuşdur. Ekskursiya çərçivəsində tələbələr şairin yaşadığı mühit, şəxsi əşyaları, əlyazmaları, fotoşəkilləri və müxtəlif dövrlərə aid sənədlərlə tanış olmuşlar.
Muzey əməkdaşları tərəfindən təqdim olunan ətraflı məlumatlar vasitəsilə iştirakçılar Səməd Vurğunun yaradıcılıq yolu, onun Azərbaycan poeziyasındakı rolu və milli ədəbiyyatın inkişafına verdiyi töhfələr barədə geniş bilik əldə etmişlər. Eyni zamanda, şairin dövrün ictimai-siyasi prosesləri ilə bağlı mövqeyi və ədəbi fəaliyyəti də diqqətə çatdırılmışdır.
Bundan əlavə, ekskursiya tələbələrdə milli-mənəvi dəyərlərə bağlılıq hissinin gücləndirilməsinə, klassik ədəbiyyata marağın artırılmasına və mədəni irsimizə hörmətin formalaşdırılmasına xidmət etmişdir. Tədbirin təşkilində əsas məqsədlərdən biri də gənclərin asudə vaxtlarının səmərəli təşkili və onların maarifləndirici mühitdə inkişafının təmin olunması olmuşdur.
Sonda qeyd olunmuşdur ki, bu cür ekskursiyaların mütəmadi təşkili tələbələrin həm nəzəri biliklərinin möhkəmləndirilməsi, həm də onların praktik müşahidə və analiz bacarıqlarının inkişafı baxımından mühüm əhəmiyyət kəsb edir. Bakı Texniki Kollecində bu istiqamətdə fəaliyyətlərin davam etdirilməsi nəzərdə tutulur.